بات بھی ان سے کر نہیں آتی

بات بھی ان سے کر نہیں آتی

آنکھ بھی اپنی بھر نہیں آتی

موت آتی ہے دہر میں سب کو

عاشقوں کو مگر نہیں آتی

جان تو اپنی آ گئی لب پر

کوئی ان کی خبر نہیں آتی

مے سے بھی غم غلط نہیں ہوتا

طبع اب موج پر نہیں آتی

ناامیدی کی اب یہ صورت ہے

کوئی امید بر نہیں آتی

نامہ بر کی بھی ہو خبر یا رب

کوئی اس کی خبر نہیں آتی

جو دعا سوئے عرش جاتی ہے

ہو کے پھر با اثر نہیں آتی

کس توقع پہ ہم جئیں رہبرؔ

اک تمنا بھی بر نہیں آتی