baat karte ho to takrar ki bu aati hai

baat karte ho to takrār kī bū aatī hai

yaar tum se kisī bīmār kī bū aatī hai

chaa.e ke saath ye ḳhabreñ na paḌhā kar varna

muñh se din bhar usī aḳhbār kī bū aatī hai

aap kah kar na ho tū mujh se muḳhātib ai dost

mujh ko is lafz se aġhyār kī bū aatī hai

terī guftār se hotā hai tijārat kā gumāñ

tere lahje se ḳharīdār kī bū aatī hai

pahle ḳhushbū kī tarah log mahakte the yahāñ

ab to girte hue me'yār kī bū aatī hai

vo jo is shahr meñ kuchh log haiñ ujle ujle

ab mujhe un se gunahgār kī bū aatī hai

tere aḳhlāq meñ ik mushk-fishānī hai 'nafas'

tere kirdār se ḳhud.dār kī bū aatī hai

baat karte ho to takrar ki bu aati hai

yar tum se kisi bimar ki bu aati hai

chae ke sath ye KHabren na paDha kar warna

munh se din bhar usi aKHbar ki bu aati hai

aap kah kar na ho tu mujh se muKHatib ai dost

mujh ko is lafz se aghyar ki bu aati hai

teri guftar se hota hai tijarat ka guman

tere lahje se KHaridar ki bu aati hai

pahle KHushbu ki tarah log mahakte the yahan

ab to girte hue me'yar ki bu aati hai

wo jo is shahr mein kuchh log hain ujle ujle

ab mujhe un se gunahgar ki bu aati hai

tere aKHlaq mein ek mushk-fishani hai 'nafas'

tere kirdar se KHuddar ki bu aati hai