baaton mein bahut gahrai hai, lahje mein baDi sachchai hai

bātoñ meñ bahut gahrā.ī hai, lahje meñ baḌī sachchā.ī hai

sab bāteñ phūloñ jaisī haiñ, āvāz madhur shahnā.ī hai

ye būñdeñ pahlī bārish kii, ye soñdhī ḳhushbū maaTī kī

ik koyal baaġh meñ kuukī hai, āvāz yahāñ tak aa.ī hai

badnām bahut hai rāh-guzar, ḳhāmosh nazar, bechain safar

ab gard jamī hai ā.ankhoñ meñ aur duur talak rusvā.ī hai

dil ek musāfir hai be-bas, jise noch rahe haiñ pesh-o-pas

ik dariyā pīchhe bahtā hai aur aage gahrī khaa.ī hai

ab ḳhvāb nahīñ kam-ḳhvāb nahīñ, kuchh jiine ke asbāb nahīñ

ab ḳhvāhish ke tālāb pe har sū māyūsī kī kaa.ī hai

pahle kabhī mahfil jamtī thī mahfil meñ kahīñ tum hote the

ab kuchh bhī nahīñ yādoñ ke sivā, bas maiñ huuñ mirī tanhā.ī hai

baaton mein bahut gahrai hai, lahje mein baDi sachchai hai

sab baaten phulon jaisi hain, aawaz madhur shahnai hai

ye bunden pahli barish ki, ye sondhi KHushbu maTi ki

ek koyal bagh mein kuki hai, aawaz yahan tak aai hai

badnam bahut hai rah-guzar, KHamosh nazar, bechain safar

ab gard jami hai aaankhon mein aur dur talak ruswai hai

dil ek musafir hai be-bas, jise noch rahe hain pesh-o-pas

ek dariya pichhe bahta hai aur aage gahri khai hai

ab KHwab nahin kam-KHwab nahin, kuchh jine ke asbab nahin

ab KHwahish ke talab pe har su mayusi ki kai hai

pahle kabhi mahfil jamti thi mahfil mein kahin tum hote the

ab kuchh bhi nahin yaadon ke siwa, bas main hun meri tanhai hai