bad-dili mein be-qarari ko qarar aaya to kya

bad-dilī meñ be-qarārī ko qarār aayā to kyā

pā-piyāda ho ke koī shahsavār aayā to kyā

zindagī kī dhuup meñ murjhā gayā merā shabāb

ab bahār aa.ī to kyā abr-e-bahār aayā to kyā

mere tevar bujh ga.e merī nigāheñ jal ga.ī

ab koī ā.īna-rū ā.īna-dār aayā to kyā

ab ki jab jānāna tum ko hai sabhī par e'tibār

ab tumheñ jānāna pe jab e'tibār aayā to kyā

ab mujhe ḳhud apnī bāhoñ par nahīñ hai iḳhtiyār

haath phailā.e koī be-iḳhtiyār aayā to kyā

vo to ab bhī ḳhvāb hai bedār bīnā.ī kā ḳhvāb

zindagī meñ ḳhvāb meñ us ke guzār aayā to kyā

ham yahāñ haiñ be-gunāh so ham meñ se 'jaun-elia'

koī jiit aayā yahāñ aur koī haar aayā to kyā

bad-dili mein be-qarari ko qarar aaya to kya

pa-piyaada ho ke koi shahsawar aaya to kya

zindagi ki dhup mein murjha gaya mera shabab

ab bahaar aai to kya abr-e-bahaar aaya to kya

mere tewar bujh gae meri nigahen jal gai

ab koi aaina-ru aaina-dar aaya to kya

ab ki jab jaanana tum ko hai sabhi par e'tibar

ab tumhein jaanana pe jab e'tibar aaya to kya

ab mujhe KHud apni bahon par nahin hai iKHtiyar

hath phailae koi be-iKHtiyar aaya to kya

wo to ab bhi KHwab hai bedar binai ka KHwab

zindagi mein KHwab mein us ke guzar aaya to kya

hum yahan hain be-gunah so hum mein se 'jaun-elia'

koi jit aaya yahan aur koi haar aaya to kya