badan bandhe hue sanson ki rahdari mein rahte hain

badan bāñdhe hue sāñsoñ kī rahdārī meñ rahte haiñ

ki ham har dam kahīñ jaane kī tayyārī meñ rahte haiñ

na hoñ aañsū to ye āñkheñ bhalī lagtī nahīñ ham ko

so aksar aap apnī hī dil-āzārī meñ rahte haiñ

hameñ mā'lūm hai raunaq ye bāzāroñ kī jhūTī hai

magar phir bhī fareb-e-husn-e-bāzārī meñ rahte haiñ

ham ahl-e-'ishq phir ahl-e-havas se maat khā baiThe

vazīfa-ḳhvār bazm-e-husn-e-darbārī meñ rahte haiñ

hamāre dil to haiñ masrūf sarkāreñ girāne meñ

badan tā'mīl-e-ahkāmāt-e-sarkārī meñ rahte haiñ

dabe haiñ ḳhaak meñ kitne hī sūraj chāñd aur taare

so ham apnī zamīñ kī āsmāñ-kārī meñ rahte haiñ

hamārī shā'irī ik mustaqil holī kā mausam hai

hazāroñ rang is lafzoñ kī pichkārī meñ rahte haiñ

‘janāb-e-farhat-ehsās' ab na shahrī haiñ na sahrā.ī

musalsal darmiyān-e-ḳhvāb-o-be-dārī meñ rahte haiñ

badan bandhe hue sanson ki rahdari mein rahte hain

ki hum har dam kahin jaane ki tayyari mein rahte hain

na hon aansu to ye aankhen bhali lagti nahin hum ko

so aksar aap apni hi dil-azari mein rahte hain

hamein ma'lum hai raunaq ye bazaron ki jhuTi hai

magar phir bhi fareb-e-husn-e-bazari mein rahte hain

hum ahl-e-'ishq phir ahl-e-hawas se mat kha baiThe

wazifa-KHwar bazm-e-husn-e-darbari mein rahte hain

hamare dil to hain masruf sarkaren girane mein

badan ta'mil-e-ahkaamat-e-sarkari mein rahte hain

dabe hain KHak mein kitne hi suraj chand aur tare

so hum apni zamin ki aasman-kari mein rahte hain

hamari sha'iri ek mustaqil holi ka mausam hai

hazaron rang is lafzon ki pichkari mein rahte hain

‘janab-e-farhat-ehsas' ab na shahri hain na sahrai

musalsal darmiyan-e-KHwab-o-be-dari mein rahte hain