badan ka bojh liye ruh ka azab liye

badan kā bojh liye ruuh kā 'azāb liye

kidhar ko jā.ūñ tabī'at kā iztirāb liye

yahī umiid ki shāyad ho koī chashm-ba-rāh

charāġh dil meñ liye haath meñ gulāb liye

'ajab nahīñ ki mirī tarh ye akelī raat

kisī ko DhūñDne niklī ho māhtāb liye

sivā hai shab ke añdheroñ se din kī tārīkī

ga.e vo din jo nikalte the āftāb liye

kisī ke shahr meñ mānind-e-barg-e-āvāra

phire haiñ kūcha-ba-kūcha ham apne ḳhvāb liye

kahāñ chale ho ḳhayāloñ ke shahr meñ 'sarvat'

ga.e dinoñ kī shikasta sī ye kitāb liye

badan ka bojh liye ruh ka 'azab liye

kidhar ko jaun tabi'at ka iztirab liye

yahi umid ki shayad ho koi chashm-ba-rah

charagh dil mein liye hath mein gulab liye

'ajab nahin ki meri tarh ye akeli raat

kisi ko DhunDne nikli ho mahtab liye

siwa hai shab ke andheron se din ki tariki

gae wo din jo nikalte the aaftab liye

kisi ke shahr mein manind-e-barg-e-awara

phire hain kucha-ba-kucha hum apne KHwab liye

kahan chale ho KHayalon ke shahr mein 'sarwat'

gae dinon ki shikasta si ye kitab liye