baDhao wada-e-farda pe tum apni ibaadat bhi

baḌhāo va.ada-e-fardā pe tum apnī ibādat bhī

ki fardā kyā na bhūlūñgā maiñ fardā-e-qayāmat bhī

shab-e-ḳhalvat jab utrīñ kashtiyoñ par kashtiyāñ mai kī

zamīñ par āsmāñ se aa gayā dariyā-e-rahmat bhī

tasallī is dil-e-betāb kī maiñ aap hī kar luuñ

hujūm-e-yās se pā.ūñ kahīñ kambaḳht fursat bhī

baham ik muḳhtasar se dil meñ haiñ shādī-o-ġham donoñ

ye chhoTā sā makāñ aur is meñ dozaḳh bhī hai jannat bhī

savāl-e-bosa par bole ki dekho tum ne phir chheḌā

tumheñ kuchh ho ga.ī hai gāliyāñ sunñe kī aadat bhī

yahāñ zāhid bane haiñ aur maiḳhāne se kal shab ko

nikāle jab ga.e mai-kash to un meñ ḳhud badaulat bhī

bane vo mudda.ī mere to mere dost bol uTThe

ki ham hāzir haiñ dene ko gavāhī bhī shahādat bhī

vo kahte haiñ ki jannat bhī hai ik kūcha hasīnoñ kā

banā lenā usī kūche meñ jā kar apnī turbat bhī

namāz-e-panjgāna se hai behtar kaam kyā zāhid

magar niyyat se pahle Thiik kar le apnī niyyat bhī

bahut achchhā rahā jo bach gayā ishq-o-mohabbat se

mohabbat hai koī ye ahl-e-duniyā kī mohabbat bhī

sar-e-bālīn-e-turbat sab dikhāne ke ye aañsū haiñ

diloñ meñ ye ki ho jaa.e kahīñ jaldī farāġhat bhī

fanā jab ho ga.e bahr-e-havādis meñ to ham ko kyā

kināre par agar kuchh haDDiyāñ pahuñchīñ salāmat bhī

shab-e-ġham niiñd bhī avval to kyoñ aane lagī mujh ko

agar soyā to uThne kā nahīñ sub.h-e-qayāmat bhī

tirī bāteñ bhī 'nādir' kitnī lachche-dār bāteñ haiñ

kuchh iz.hār-e-itā.at bhī kuchh andāz-e-matānat bhī

baDhao wada-e-farda pe tum apni ibaadat bhi

ki farda kya na bhulunga main farda-e-qayamat bhi

shab-e-KHalwat jab utrin kashtiyon par kashtiyan mai ki

zamin par aasman se aa gaya dariya-e-rahmat bhi

tasalli is dil-e-betab ki main aap hi kar lun

hujum-e-yas se paun kahin kambaKHt fursat bhi

baham ek muKHtasar se dil mein hain shadi-o-gham donon

ye chhoTa sa makan aur is mein dozaKH bhi hai jannat bhi

sawal-e-bosa par bole ki dekho tum ne phir chheDa

tumhein kuchh ho gai hai galiyan sunne ki aadat bhi

yahan zahid bane hain aur maiKHane se kal shab ko

nikale jab gae mai-kash to un mein KHud badaulat bhi

bane wo muddai mere to mere dost bol uTThe

ki hum hazir hain dene ko gawahi bhi shahadat bhi

wo kahte hain ki jannat bhi hai ek kucha hasinon ka

bana lena usi kuche mein ja kar apni turbat bhi

namaz-e-panjgana se hai behtar kaam kya zahid

magar niyyat se pahle Thik kar le apni niyyat bhi

bahut achchha raha jo bach gaya ishq-o-mohabbat se

mohabbat hai koi ye ahl-e-duniya ki mohabbat bhi

sar-e-baalin-e-turbat sab dikhane ke ye aansu hain

dilon mein ye ki ho jae kahin jaldi faraghat bhi

fana jab ho gae bahr-e-hawadis mein to hum ko kya

kinare par agar kuchh haDDiyan pahunchin salamat bhi

shab-e-gham nind bhi awwal to kyon aane lagi mujh ko

agar soya to uThne ka nahin subh-e-qayamat bhi

teri baaten bhi 'nadir' kitni lachche-dar baaten hain

kuchh izhaar-e-itaat bhi kuchh andaz-e-matanat bhi