baDhta hi ja raha hai simaT kyon nahin raha

baḌhtā hī jā rahā hai simaT kyoñ nahīñ rahā

mahv-e-safar huuñ rāsta kaT kyoñ nahīñ rahā

saaya kisī vujūd kā hai mere sāmne

pīchhe haTā rahā huuñ to haT kyoñ nahīñ rahā

phir us ne mere saath marāsim banā liye

ye kār-e-‘āshiqī bhī nimaT kyoñ nahīñ rahā

baḌhtī hī jā rahī hai mire ghar kī tīrgī

bādal ġhamoñ kā āñkhoñ se chhaT kyoñ nahīñ rahā

vāris haiñ beTiyāñ bhī agar jā.edād kī

phir beTiyoñ meñ hissa ye baT kyoñ nahīñ rahā

maiñ māntā huuñ ḳhushiyāñ ta'āqub meñ haiñ magar

pahle se ġham ziyāda hai ghaT kyoñ nahīñ rahā

tujh se bichhaḌ rahā huuñ maiñ kaise ḳhushī ḳhushī

hairat hai ġham se dil mirā phaT kyoñ nahīñ rahā

tere hī dā.ere meñ hai 'shahzād' ye badan

lekin tū mere saath lipaT kyoñ nahīñ rahā

baDhta hi ja raha hai simaT kyon nahin raha

mahw-e-safar hun rasta kaT kyon nahin raha

saya kisi wujud ka hai mere samne

pichhe haTa raha hun to haT kyon nahin raha

phir us ne mere sath marasim bana liye

ye kar-e-‘ashiqi bhi nimaT kyon nahin raha

baDhti hi ja rahi hai mere ghar ki tirgi

baadal ghamon ka aankhon se chhaT kyon nahin raha

waris hain beTiyan bhi agar jaedad ki

phir beTiyon mein hissa ye baT kyon nahin raha

main manta hun KHushiyan ta'aqub mein hain magar

pahle se gham ziyaada hai ghaT kyon nahin raha

tujh se bichhaD raha hun main kaise KHushi KHushi

hairat hai gham se dil mera phaT kyon nahin raha

tere hi daere mein hai 'shahzad' ye badan

lekin tu mere sath lipaT kyon nahin raha