بڑی مدت سے قسمت آزمانے کی تمنا ہے

بڑی مدت سے قسمت آزمانے کی تمنا ہے

تجھے پانے تجھے اپنا بنانے کی تمنا ہے

کبھی تو بندگی کی لذتوں سے آشنا ہوگا

کسی کے نقش پا پر سر جھکانے کی تمنا ہے

رلایا ہے مجھے جس غم نے برسوں خون کے آنسو

مجھے اس غم پہ اک دن مسکرانے کی تمنا ہے

اب ان کے در پہ آ بیٹھی وہ جانیں یا مری قسمت

کہیں آنے کی خواہش ہے نہ جانے کی تمنا ہے

الٰہی خیر مدت ہو گئی بھولے ہوئے جس کو

وہ نغمہ ساز دل پر گنگنانے کی تمنا ہے

وفاؔ تم بھی عجب ہو خوب ہے بازی محبت کی

کہ اس کو جیت کر بھی ہار جانے کی تمنا ہے