baghair yar gawara nahin kabab sharab

baġhair yaar gavārā nahīñ kabāb sharāb

gazak hai daaġh mujhe aur ḳhūn-e-nāb sharāb

agar hai shauq-e-tahārat sharāb pī zāhid

tire najāsat-e-qalbī ko hogī aab sharāb

dimāġh ahl-e-ḳharābāt ke mo.attar haiñ

kabāb nāfa-e-mushk-e-ḳhutan gulāb sharāb

piyūñ najāt samajh ke jo ishq-e-sāqī hai

darūd paḌh ke tapā.ūñ pa.e savāb sharāb

baġhair sukr huā hai ye ālam-e-sakrāt

hamāre muñh meñ chuvāo bajā.e aab sharāb

chaman pe jhuum rahā hai siyāh mastī meñ

ajab bahār hai barsā.e jo sahāb sharāb

shab-e-visāl hai anjum khilā.eñ naql mujhe

pilā.e apne piyāle meñ māhtāb sharāb

bahut mazammat-e-mai-ḳhvār likh rahā hai shaiḳh

ḳhudā kare ki bane jadval-e-kitāb sharāb

chale bahār ke ayyām sāqī-e-gul-rū

mirā shabāb hai mehmān lā shitāb sharāb

koī gazak gazak-e-husn se nahīñ a.alā

sharāboñ meñ hai mai-e-ishq intiḳhāb sharāb

hai nūr-e-nashshā ziyā-baḳhsh dīda-e-irfāñ

dur-e-yagāna-e-dil kī hai āb-o-tāb sharāb

ḳhudā ke ghar meñ vo barrā rahā hai ai rindo

jagāo shaiḳh ko chiḌko ba-rū-e-ḳhvāb sharāb

na dekhe buġhz se mānind-e-shapparak zāhid

hai apne nuur se ham-jām-e-āftāb sharāb

nashāt-o-aish jahāñ par na 'bahr' lahrānā

ki bāġh-e-sabz-e-gulistān hai sarāb sharāb

baghair yar gawara nahin kabab sharab

gazak hai dagh mujhe aur KHun-e-nab sharab

agar hai shauq-e-tahaarat sharab pi zahid

tere najasat-e-qalbi ko hogi aab sharab

dimagh ahl-e-KHarabaat ke moattar hain

kabab nafa-e-mushk-e-KHutan gulab sharab

piyun najat samajh ke jo ishq-e-saqi hai

darud paDh ke tapaun pae sawab sharab

baghair sukr hua hai ye aalam-e-sakraat

hamare munh mein chuwao bajae aab sharab

chaman pe jhum raha hai siyah masti mein

ajab bahaar hai barsae jo sahab sharab

shab-e-visal hai anjum khilaen naql mujhe

pilae apne piyale mein mahtab sharab

bahut mazammat-e-mai-KHwar likh raha hai shaiKH

KHuda kare ki bane jadwal-e-kitab sharab

chale bahaar ke ayyam saqi-e-gul-ru

mera shabab hai mehman la shitab sharab

koi gazak gazak-e-husn se nahin aala

sharabon mein hai mai-e-ishq intiKHab sharab

hai nur-e-nashsha ziya-baKHsh dida-e-irfan

dur-e-yagana-e-dil ki hai aab-o-tab sharab

KHuda ke ghar mein wo barra raha hai ai rindo

jagao shaiKH ko chiDko ba-ru-e-KHwab sharab

na dekhe bughz se manind-e-shapparak zahid

hai apne nur se ham-jam-e-aftab sharab

nashat-o-aish jahan par na 'bahr' lahrana

ki bagh-e-sabz-e-gulistan hai sarab sharab