بحر بے آب کے علاوہ بھی

بحر بے آب کے علاوہ بھی

وہ ملے خواب کے علاوہ بھی

دل مرا چاہتا ہے رستہ ہو

گرد گرداب کے علاوہ بھی

کچھ مرے اور بھی تو دشمن ہیں

میرے احباب کے علاوہ بھی

حسن کہتا ہے دیجئے تشبیہ

مجھ کو مہتاب کے علاوہ بھی

کچھ سبب چاہئے تھا ملنے کا

باقی اسباب کے علاوہ بھی

داغ کچھ اور بھی جبیں پر ہیں

داغ محراب کے علاوہ بھی

فکر ہے مجھ کو سوکھے پیڑوں کی

شجر شاداب کے علاوہ بھی

پر پرندوں کے ہیں عزیز خضرؔ

مجھ کو سرخاب کے علاوہ بھی