bahr-e-parwaz agar apni KHushi se uDte

bahr-e-parvāz agar apnī ḳhushī se uḌte

ham bhī shahbāz haiñ ham bhī bahut ūñche uḌte

ek sahrā hai ki bujhtī hī nahīñ pyaas us kī

muddateñ guzrīñ samundar ke kināre uḌte

fat.h ke jashn pe chhoḌe the jo ham ne yaaro

āsmānoñ meñ kahāñ tak vo ġhubāre uḌte

shahr kā shahr hī āseb-zada hai shāyad

ham ne dekhe haiñ galī kūchoñ meñ saa.e uḌte

qaid-o-band apnī jagah dāna-o-dām apnī jagah

vo jo uḌnā hī nahīñ jānte kaise uḌte

ham isī shauq-e-nazāra meñ hue āvāra

kisī khiḌkī kisī darvāze ke parde uḌte

sard-mehrī se tirī sard huā merā badan

varna ham zaḳhm se kuchh ḳhuun ke chhīñTe uḌte

khīñch letā jo koī ḳhuun se tasvīr-e-bahār

rang-o-bū uḌte chaman se na parinde uḌte

farsh kī had se havāoñ ne tajāvuz na kiyā

arsh tak varna mirī ḳhaak ke zarre uḌte

bahr-e-parwaz agar apni KHushi se uDte

hum bhi shahbaz hain hum bhi bahut unche uDte

ek sahra hai ki bujhti hi nahin pyas us ki

muddaten guzrin samundar ke kinare uDte

fath ke jashn pe chhoDe the jo hum ne yaro

aasmanon mein kahan tak wo ghubare uDte

shahr ka shahr hi aaseb-zada hai shayad

hum ne dekhe hain gali kuchon mein sae uDte

qaid-o-band apni jagah dana-o-dam apni jagah

wo jo uDna hi nahin jaante kaise uDte

hum isi shauq-e-nazara mein hue aawara

kisi khiDki kisi darwaze ke parde uDte

sard-mehri se teri sard hua mera badan

warna hum zaKHm se kuchh KHun ke chhinTe uDte

khinch leta jo koi KHun se taswir-e-bahaar

rang-o-bu uDte chaman se na parinde uDte

farsh ki had se hawaon ne tajawuz na kiya

arsh tak warna meri KHak ke zarre uDte