bahs mein donon ko lutf aata raha

bahs meñ donoñ ko lutf aatā rahā

mujh ko dil maiñ dil ko samjhātā rahā

un kī mahfil meñ dil-e-pur-iztirāb

ek sho.ala thā jo tharrātā rahā

maut ke dhoke meñ ham kyuuñ aa ga.e

zindagī kā bhī mazā jaatā rahā

nā-shagufta hī rahī dil kī kalī

mausam-e-gul bār-hā aatā rahā

jab se tum ne dushmanī kī iḳhtiyār

e'tibār-e-dostī jaatā rahā

apnī hī zid kī dil-e-betāb ne

un ke dar tak bhī maiñ samjhātā rahā

jaur to ai 'josh' āḳhir jaur hai

lutf bhī un kā sitam Dhātā rahā

bahs mein donon ko lutf aata raha

mujh ko dil main dil ko samjhata raha

un ki mahfil mein dil-e-pur-iztirab

ek shoala tha jo tharraata raha

maut ke dhoke mein hum kyun aa gae

zindagi ka bhi maza jata raha

na-shagufta hi rahi dil ki kali

mausam-e-gul bar-ha aata raha

jab se tum ne dushmani ki iKHtiyar

e'tibar-e-dosti jata raha

apni hi zid ki dil-e-betab ne

un ke dar tak bhi main samjhata raha

jaur to ai 'josh' aaKHir jaur hai

lutf bhi un ka sitam Dhata raha