bahut dinon mein junun mein kamal maine kiya

bahut dinoñ meñ junūñ meñ kamāl maiñ ne kiyā

kal us ke baare meñ pahlā savāl maiñ ne kiyā

koī to baat hai sadiyoñ alag rahā jis se

ta'alluq us se dubāra bahāl maiñ ne kiyā

milā hai mujh ko ishāra udhar kā jis din se

munāfiqīn kā jiinā muhāl maiñ ne kiyā

ye sarkashī hai ki josh-e-junūñ ḳhudā jaane

ba-zo'm-e-ḳhud use ḳhud par halāl maiñ ne kiyā

hazāroñ log mile mil ke sab bichhaḌ bhī ga.e

kisī kā dil se na lekin malāl maiñ ne kiyā

mujhe vo shaḳhs kuchh itnā 'azīz thā 'najmī'

qazā thī us kī magar intiqāl maiñ ne kiyā

bahut dinon mein junun mein kamal main ne kiya

kal us ke bare mein pahla sawal main ne kiya

koi to baat hai sadiyon alag raha jis se

ta'alluq us se dubara bahaal main ne kiya

mila hai mujh ko ishaara udhar ka jis din se

munafiqin ka jina muhaal main ne kiya

ye sarkashi hai ki josh-e-junun KHuda jaane

ba-zo'm-e-KHud use KHud par halal main ne kiya

hazaron log mile mil ke sab bichhaD bhi gae

kisi ka dil se na lekin malal main ne kiya

mujhe wo shaKHs kuchh itna 'aziz tha 'najmi'

qaza thi us ki magar intiqal main ne kiya