bahut dinon se hamara KHwabon se koi bhi rabta nahin hai

bahut dinoñ se hamārā ḳhvāboñ se koī bhī rābta nahīñ hai

kuchh aise kār-e-jahāñ meñ kho.e ki apnā bhī kuchh pata nahīñ hai

ye nā-umīdī kī intihā hai ki āgahī kī hai koī manzil

ye dil ko kyā āriza huā hai ise kisī se gila nahīñ hai

hamesha sach bolne kī aadat hai kyā kareñ bolte raheñge

qadam qadam par hai āzmā.ish ki sahl ye marhala nahīñ hai

ham un kī har baat maan lete to zindagī chain se guzartī

bas izzat-e-nafs roktī hai anā kā ye mas.ala nahīñ hai

yūñhī bhaTakte phireñge kab tak ḳhud apne andar talāsh kar leñ

jahāñ mukammal sukūñ mayassar ho aisī koī jagah nahīñ hai

bas ik pareshāñ hujūm ke saath ham bhī shāmil haiñ chal rahe haiñ

na koī naqsh-e-qadam salāmat kahīñ koī rāsta nahīñ hai

ye shaam itnī udaas kyoñ hai kahīñ koī hādisa huā hai

ye ḳhuuñ kī surḳhī shafaq ke rangoñ meñ ghul ga.ī be-vajah nahīñ hai

sitāra-e-sub.h DhūñDte haiñ ġhubār-ālūda mausamoñ meñ

nazar se ojhal to ho gayā hai magar abhī gum-shuda nahīñ hai

bahut dinon se hamara KHwabon se koi bhi rabta nahin hai

kuchh aise kar-e-jahan mein khoe ki apna bhi kuchh pata nahin hai

ye na-umidi ki intiha hai ki aagahi ki hai koi manzil

ye dil ko kya aariza hua hai ise kisi se gila nahin hai

hamesha sach bolne ki aadat hai kya karen bolte rahenge

qadam qadam par hai aazmaish ki sahl ye marhala nahin hai

hum un ki har baat man lete to zindagi chain se guzarti

bas izzat-e-nafs rokti hai ana ka ye masala nahin hai

yunhi bhaTakte phirenge kab tak KHud apne andar talash kar len

jahan mukammal sukun mayassar ho aisi koi jagah nahin hai

bas ek pareshan hujum ke sath hum bhi shamil hain chal rahe hain

na koi naqsh-e-qadam salamat kahin koi rasta nahin hai

ye sham itni udas kyon hai kahin koi hadisa hua hai

ye KHun ki surKHi shafaq ke rangon mein ghul gai be-wajah nahin hai

sitara-e-subh DhunDte hain ghubar-aluda mausamon mein

nazar se ojhal to ho gaya hai magar abhi gum-shuda nahin hai