بہت گھبرا رہے ہو روشنی سے

بہت گھبرا رہے ہو روشنی سے

محبت ہو گئی ہے کیا کسی سے

پتا دیتی ہے یہ چہرے کی رنگت

خدا خوش ہے تو بس اک آپ ہی سے

شناسائی نکل آئی پرانی

نہیں تو کیوں لپٹتا اجنبی سے

زباں سے یوں ادا ہوتی ہے اردو

سریلی تان جیسے بانسری سے

قدم دونوں طرف سے بڑھ چکے ہیں

محبت ہوگی رسوا واپسی سے

ہنسی آئی کبھی یلغار غم پر

چھلک آئیں کبھی آنکھیں خوشی سے

بہت با ظرف ہوں لیکن پشیماں

سمندر بول اٹھا تشنگی سے

حفاظت کر نہ پائے نذرؔ دل کی

چرایا ہی گیا اس سادگی سے