بہت قریب ہے دل کے مگر نہیں ملتی

بہت قریب ہے دل کے مگر نہیں ملتی

ہمیں پسند ہے جو شے ادھر نہیں ملتی

چمن میں پھول میں گلشن میں ہر نظارے میں

تلاش اس کو میں کرتا ہوں پر نہیں ملتی

وہ دیکھو آیا ہے قاصد بھی بعد مدت کے

خبر یہ لایا کہ کوئی خبر نہیں ملتی

نہ جانے کتنی ہی راہیں تلاش کر بیٹھے

تمہارے عشق کی کوئی ڈگر نہیں ملتی

فریبی راہ پہ چل کر نہ ڈھونڈ منزل کو

جو مل بھی جائے اگر معتبر نہیں ملتی

غم فراق کی غربت سے بے خبر رہتے

ہمیں یہ عشق کی دولت اگر نہیں ملتی

میں سوچتا ہوں غنیمت تھی زندگی اپنی

اے کاش ان سے ہماری نظر نہیں ملتی

اندھیری رات کو اس کی تو بے سبب نا سمجھ

سحر کے بعد ضیائے قمر نہیں ملتی