bahut rote hain lekin dil ki virani nahin jati

bahut rote haiñ lekin dil kī vīrānī nahīñ jaatī

ho koshish bhī jo jiine kī to be-jānī nahīñ jaatī

samajhte haiñ ki ye hijrat muqaddar hai zamāne kā

samajh kar bhī hamāre man kī nādānī nahīñ jaatī

hamāre zehn-o-dil meñ ek tūfāñ hai jo vahshat kā

kashīd-e-jām-o-mai se bhī ye bohrānī nahīñ jaatī

batāo ham ko nā vā'iz hameñ ‘irfān-e-‘ālam hai

añdherā ho jo āñkhoñ meñ to pahchānī nahīñ jaatī

ye ik jhagḌā hai tan-man meñ ye ik paikār-e-jān-o-dil

ye sab kuchh hai magar man kī ye man-mānī nahīñ jaatī

bahut se tai kiye ham ne ġhamoñ kī sard rāhoñ ko

magar ik rāh-e-ġham ye jis kī daurānī nahīñ jaatī

bahā.e chashm-o-mizhgāñ ne jo ashk-e-ḳhūn-e-dil ab ke

ye chāhā bhī ki tham jaa.e to bārānī nahīñ jaatī

ye kaise ho gayā mumkin ki jo jān-e-dil-o-jāñ the

judā bhī ho ga.e ham se ye hairānī nahīñ jaatī

yahāñ 'āhan' jo baiThā hai kanār-e-turbat-e-ābā

so is ke tāb-e-shauq-e-ġham kī tābānī nahīñ jaatī

bahut rote hain lekin dil ki virani nahin jati

ho koshish bhi jo jine ki to be-jaani nahin jati

samajhte hain ki ye hijrat muqaddar hai zamane ka

samajh kar bhi hamare man ki nadani nahin jati

hamare zehn-o-dil mein ek tufan hai jo wahshat ka

kashid-e-jam-o-mai se bhi ye bohrani nahin jati

batao hum ko na wa'iz hamein ‘irfan-e-‘alam hai

andhera ho jo aankhon mein to pahchani nahin jati

ye ek jhagDa hai tan-man mein ye ek paikar-e-jaan-o-dil

ye sab kuchh hai magar man ki ye man-mani nahin jati

bahut se tai kiye hum ne ghamon ki sard rahon ko

magar ek rah-e-gham ye jis ki daurani nahin jati

bahae chashm-o-mizhgan ne jo ashk-e-KHun-e-dil ab ke

ye chaha bhi ki tham jae to barani nahin jati

ye kaise ho gaya mumkin ki jo jaan-e-dil-o-jaan the

juda bhi ho gae hum se ye hairani nahin jati

yahan 'ahan' jo baiTha hai kanar-e-turbat-e-aba

so is ke tab-e-shauq-e-gham ki tabani nahin jati