بہت روتے ہیں لیکن دل کی ویرانی نہیں جاتی

بہت روتے ہیں لیکن دل کی ویرانی نہیں جاتی

ہو کوشش بھی جو جینے کی تو بے جانی نہیں جاتی

سمجھتے ہیں کہ یہ ہجرت مقدر ہے زمانے کا

سمجھ کر بھی ہمارے من کی نادانی نہیں جاتی

ہمارے ذہن و دل میں ایک طوفاں ہے جو وحشت کا

کشید جام و مے سے بھی یہ بحرانی نہیں جاتی

بتاؤ ہم کو نا واعظ ہمیں عرفان عالم ہے

اندھیرا ہو جو آنکھوں میں تو پہچانی نہیں جاتی

یہ اک جھگڑا ہے تن من میں یہ اک پیکار جان و دل

یہ سب کچھ ہے مگر من کی یہ من مانی نہیں جاتی

بہت سے طے کیے ہم نے غموں کی سرد راہوں کو

مگر اک راہ غم یہ جس کی دورانی نہیں جاتی

بہائے چشم و مژگاں نے جو اشک خون دل اب کے

یہ چاہا بھی کہ تھم جائے تو بارانی نہیں جاتی

یہ کیسے ہو گیا ممکن کہ جو جان دل و جاں تھے

جدا بھی ہو گئے ہم سے یہ حیرانی نہیں جاتی

یہاں آہنؔ جو بیٹھا ہے کنار تربت آبا

سو اس کے تاب شوق غم کی تابانی نہیں جاتی