baiTh kar chae pi humne jahan barsat ke baad

baiTh kar chaa.e pī ham ne jahāñ barsāt ke baa'd

terī ḳhushbū usī kamre meñ hai us raat ke baa'd

bas tirī baat sunī thī jo vahī kaafī thī

kaun suntā hai koī baat tirī baat ke baa'd

o.e-ho.e ye tirī uñgliyāñ barkat vaalī

mere kaase meñ chamak hai tirī ḳhairāt ke baa'd

apnī nazroñ ke ḳhazānoñ se diyā jo tū ne

ek tavangar se lage ham tirī sauġhāt ke baa'd

maiñ ḳhatā-kār rahūñ phir bhī navāze aisī

aur koī zaat na dekhī tirī ik zaat ke baa'd

yuuñ to sahtā rahā dhūpoñ kī vo bauchhāreñ magar

merā ghar Tuut gayā thoḌī sī barsāt ke baa'd

zindagī ne to har ik ġham se navāzā 'āqib'

kyā bachā aur batā is kī 'ināyāt ke baa'd

baiTh kar chae pi hum ne jahan barsat ke ba'd

teri KHushbu usi kamre mein hai us raat ke ba'd

bas teri baat suni thi jo wahi kafi thi

kaun sunta hai koi baat teri baat ke ba'd

oe-hoe ye teri ungliyan barkat wali

mere kase mein chamak hai teri KHairaat ke ba'd

apni nazron ke KHazanon se diya jo tu ne

ek tawangar se lage hum teri saughat ke ba'd

main KHata-kar rahun phir bhi nawaze aisi

aur koi zat na dekhi teri ek zat ke ba'd

yun to sahta raha dhupon ki wo bauchhaaren magar

mera ghar Tut gaya thoDi si barsat ke ba'd

zindagi ne to har ek gham se nawaza 'aqib'

kya bacha aur bata is ki 'inayat ke ba'd