baiThe hain ab to hum bhi bologe tum na jab tak

baiThe haiñ ab to ham bhī bologe tum na jab tak

dekheñ to aap ham se nā-ḳhush raheñge kab tak

iqrār thā sahar kā aisā huā sabab kyā

jo shaam hone aa.ī aur vo na aayā ab tak

mahfil meñ gul-ruḳhoñ ke aayā jo vo parī-rū

ho shakl-e-hairat us kī sūrat rahe vo sab tak

bosa 'nazīr' ham ko dene kahā thā us ne

ham vaqt pā ke jis dam lene kī pahuñche Dhab tak

har chand thā nashe meñ vo shoḳh to bhī us ne

hargiz hamāre lab ko aane diyā na lab tak

baiThe hain ab to hum bhi bologe tum na jab tak

dekhen to aap hum se na-KHush rahenge kab tak

iqrar tha sahar ka aisa hua sabab kya

jo sham hone aai aur wo na aaya ab tak

mahfil mein gul-ruKHon ke aaya jo wo pari-ru

ho shakl-e-hairat us ki surat rahe wo sab tak

bosa 'nazir' hum ko dene kaha tha us ne

hum waqt pa ke jis dam lene ki pahunche Dhab tak

har chand tha nashe mein wo shoKH to bhi us ne

hargiz hamare lab ko aane diya na lab tak