bajae gul mujhe tohfa diya babulon ka

bajā.e gul mujhe tohfa diyā babūloñ kā

maiñ munharif to nahīñ thā tire usūloñ kā

izāla kaise karegā vo apnī bhūloñ kā

ki jis ke ḳhuun meñ nashsha nahīñ usūloñ kā

nafas kā qarz chukānā bhī koī khel nahīñ

vo jaan jā.egā anjām apnī bhūloñ kā

na.ī talāsh ke ye mīr-e-kārvāñ hoñge

banāte jaao yuuñ hī silsila bagūloñ kā

ye aaḌī tirchhī lakīreñ badal nahīñ saktīñ

hazār vāsta dete raho usūloñ kā

tamām falsafa-e-kā.enāt khul jaate

kahāñ se TuuT gayā silsila nuzūloñ kā

inhīñ se mujh ko milā azm-e-zindagī 'ajmal'

maiñ jāntā huuñ ki kyā hai maqām phūloñ kā

bajae gul mujhe tohfa diya babulon ka

main munharif to nahin tha tere usulon ka

izala kaise karega wo apni bhulon ka

ki jis ke KHun mein nashsha nahin usulon ka

nafas ka qarz chukana bhi koi khel nahin

wo jaan jaega anjam apni bhulon ka

nai talash ke ye mir-e-karwan honge

banate jao yun hi silsila bagulon ka

ye aaDi tirchhi lakiren badal nahin saktin

hazar wasta dete raho usulon ka

tamam falsafa-e-kaenat khul jate

kahan se TuT gaya silsila nuzulon ka

inhin se mujh ko mila azm-e-zindagi 'ajmal'

main jaanta hun ki kya hai maqam phulon ka