bajae koi shahnai mujhe achchha nahin lagta

bajā.e koī shahnā.ī mujhe achchhā nahīñ lagtā

mohabbat kā tamāshā.ī mujhe achchhā nahīñ lagtā

vo jab bichhḌe the ham to yaad hai garmī kī chhuTTīyāñ thiiñ

tabhī se maah july mujhe achchhā nahīñ lagtā

vo sharmātī hai itnā ki hamesha us kī bātoñ kā

qarīban ek chauthā.ī mujhe achchhā nahīñ lagtā

na-jāne itnī kaḌvāhaT kahāñ se aa ga.ī mujh meñ

kare jo merī achchhā.ī mujhe achchhā nahīñ lagtā

mire dushman ko itnī fauqiyat to hai bahar-sūrat

ki tū hai us kī ham-sā.ī mujhe achchhā nahīñ lagtā

na itnī daad do jis meñ mirī āvāz dab jaa.e

kare jo yuuñ pazīrā.ī mujhe achchhā nahīñ lagtā

tirī ḳhātir nazar-andāz kartā huuñ use varna

vo jo hai nā tirā bhaa.ī mujhe achchhā nahīñ lagtā

bajae koi shahnai mujhe achchha nahin lagta

mohabbat ka tamashai mujhe achchha nahin lagta

wo jab bichhDe the hum to yaad hai garmi ki chhuTTiyan thin

tabhi se mah july mujhe achchha nahin lagta

wo sharmati hai itna ki hamesha us ki baaton ka

qariban ek chauthai mujhe achchha nahin lagta

na-jaane itni kaDwahaT kahan se aa gai mujh mein

kare jo meri achchhai mujhe achchha nahin lagta

mere dushman ko itni fauqiyat to hai bahar-surat

ki tu hai us ki ham-sai mujhe achchha nahin lagta

na itni dad do jis mein meri aawaz dab jae

kare jo yun pazirai mujhe achchha nahin lagta

teri KHatir nazar-andaz karta hun use warna

wo jo hai na tera bhai mujhe achchha nahin lagta