bani hai dahshaton ki ek andheri jhil mujh mein

banī hai dahshatoñ kī ik añdherī jhiil mujh meñ

tumhāre ḳhauf saare ho ga.e tahlīl mujh meñ

maiñ kartā hī rahā yakjā tamanna ke 'anāsir

hazāroñ ḳhvāb hote hī ga.e tashkīl mujh meñ

irāde to dil-e-nādān kartā thā musalsal

agarche ho nahīñ paayā koī takmīl mujh meñ

siyāhī shaam kī le kar vo utrā ḳhalvatoñ meñ

phir us ne naqsh kar dī raat kī tafsīl mujh meñ

mire baare meñ itnā ġhaur farmāne lage ho

kahīñ tum ho na jaao hū-ba-hū tabdīl mujh meñ

zamāna to mire andar kushāda ho rahā hai

musalsal ho rahī hai par mirī taqlīl mujh meñ

mujhe ab raushnī ke saath hī rahnā paḌegā

jalā kar rakh gayā vo pyaar kī qindīl mujh meñ

bani hai dahshaton ki ek andheri jhil mujh mein

tumhaare KHauf sare ho gae tahlil mujh mein

main karta hi raha yakja tamanna ke 'anasir

hazaron KHwab hote hi gae tashkil mujh mein

irade to dil-e-nadan karta tha musalsal

agarche ho nahin paya koi takmil mujh mein

siyahi sham ki le kar wo utra KHalwaton mein

phir us ne naqsh kar di raat ki tafsil mujh mein

mere bare mein itna ghaur farmane lage ho

kahin tum ho na jao hu-ba-hu tabdil mujh mein

zamana to mere andar kushada ho raha hai

musalsal ho rahi hai par meri taqlil mujh mein

mujhe ab raushni ke sath hi rahna paDega

jala kar rakh gaya wo pyar ki qindil mujh mein