بنی ہے دہشتوں کی اک اندھیری جھیل مجھ میں

بنی ہے دہشتوں کی اک اندھیری جھیل مجھ میں

تمہارے خوف سارے ہو گئے تحلیل مجھ میں

میں کرتا ہی رہا یکجا تمنا کے عناصر

ہزاروں خواب ہوتے ہی گئے تشکیل مجھ میں

ارادے تو دل نادان کرتا تھا مسلسل

اگرچہ ہو نہیں پایا کوئی تکمیل مجھ میں

سیاہی شام کی لے کر وہ اترا خلوتوں میں

پھر اس نے نقش کر دی رات کی تفصیل مجھ میں

مرے بارے میں اتنا غور فرمانے لگے ہو

کہیں تم ہو نہ جاؤ ہو بہ ہو تبدیل مجھ میں

زمانہ تو مرے اندر کشادہ ہو رہا ہے

مسلسل ہو رہی ہے پر مری تقلیل مجھ میں

مجھے اب روشنی کے ساتھ ہی رہنا پڑے گا

جلا کر رکھ گیا وو پیار کی قندیل مجھ میں