bapa ho jaega mahshar jo gham-KHwaron ko nind aai

bapā ho jā.egā mahshar jo ġham-ḳhvāroñ ko niiñd aa.ī

qabīle luT hī jā.eñge jo sardāroñ ko niiñd aa.ī

ka.ī rātoñ kī bedārī salīb-o-dār jaisī thī

bahut mushkil se kal shab dard ke māroñ ko niiñd aa.ī

chaman meñ ġhuncha-o-gul par sitam hotā rahā shab bhar

hifāzat meñ jo un kī the unhīñ ḳhāroñ ko niiñd aa.ī

jalā kar ḳhaak kar Daalā mohabbat ke gulistāñ ko

'adāvat ke dahakte tab un angāroñ ko niiñd aa.ī

surūr-o-kaif ke qisse bayāñ hote rahe kal shab

na soyā sāqi-e-mahfil na mai-ḳhvāroñ ko niiñd aa.ī

jo haq ke saath rahte the jo haq kī baat karte the

jalā kar bastiyāñ un kī sitam-gāroñ ko niiñd aa.ī

'ajab thā ik tamāsha chār-sū thī nuur kī bārish

'qamar' jab chāñd soyā tab kahīñ tāroñ ko niiñd aa.ī

bapa ho jaega mahshar jo gham-KHwaron ko nind aai

qabile luT hi jaenge jo sardaron ko nind aai

kai raaton ki bedari salib-o-dar jaisi thi

bahut mushkil se kal shab dard ke maron ko nind aai

chaman mein ghuncha-o-gul par sitam hota raha shab bhar

hifazat mein jo un ki the unhin KHaron ko nind aai

jala kar KHak kar Dala mohabbat ke gulistan ko

'adawat ke dahakte tab un angaron ko nind aai

surur-o-kaif ke qisse bayan hote rahe kal shab

na soya saqi-e-mahfil na mai-KHwaron ko nind aai

jo haq ke sath rahte the jo haq ki baat karte the

jala kar bastiyan un ki sitam-garon ko nind aai

'ajab tha ek tamasha chaar-su thi nur ki barish

'qamar' jab chand soya tab kahin taron ko nind aai