barpa kisi din mahfil-e-tanhai karenge

barpā kisī din mahfil-e-tanhā.ī kareñge

aao to shab-e-hijr kī bharpā.ī kareñge

ham vo tire hushyār ki aap apne hī hāthoñ

apnī hī galī apnī hī rusvā.ī kareñge

kyoñ she'r sunāne pe mirī jaan musir ho

ham log to zaḳhmoñ kī pazīrā.ī kareñge

paanī pe chaleñge kabhī taireñge fazā meñ

mumkin nahīñ jo kuchh tire saudā.ī kareñge

neza liye nikle haiñ to kyoñ ḳhauf-zada ho

sarkār ba-har-hāl masīhā.ī kareñge

ro.eñge hameñ shahr ke hangāme divāno

jangal meñ agar anjuman-ārā.ī kareñge

aa jaao ki sīnoñ ke diye bujhne lage haiñ

aa jaao kahāñ tak nafas-ārā.ī kareñge

barpa kisi din mahfil-e-tanhai karenge

aao to shab-e-hijr ki bharpai karenge

hum wo tere hushyar ki aap apne hi hathon

apni hi gali apni hi ruswai karenge

kyon she'r sunane pe meri jaan musir ho

hum log to zaKHmon ki pazirai karenge

pani pe chalenge kabhi tairenge faza mein

mumkin nahin jo kuchh tere saudai karenge

neza liye nikle hain to kyon KHauf-zada ho

sarkar ba-har-haal masihai karenge

roenge hamein shahr ke hangame diwano

jangal mein agar anjuman-arai karenge

aa jao ki sinon ke diye bujhne lage hain

aa jao kahan tak nafas-arai karenge