barsar-e-taaruf the ehtiyat ke sae

barsar-e-ta'āruf the ehtiyāt ke saa.e

vo bhī kuchh na kah paa.e ham bhī kuchh na kah paa.e

din hasīñ bahāroñ ke yuuñ bhī ham ko yaad aa.e

qahqahoñ ke afsāne āñsuoñ ne dohrā.e

kitne hī bhayānak hoñ un se ḳhauf kyā khānā

saa.e haiñ bahar-sūrat raushnī ke hamsā.e

diid ke tamāshe bhī kam nahīñ sarāboñ se

duur ham hue utne jitne vo qarīb aa.e

kis jagah huā hai gum kuchh pata nahīñ chaltā

ham zamīr-e-insāñ ko har taraf pukār aa.e

raushnī milī lekin ye bhī aap ne dekhā

dhuup kī tamāzat se kitne phuul kumhlā.e

chhīn le koī 'kaifī' mujh se merī tanhā.ī

saañp ban ke Daste haiñ mujh ko ab mire saa.e

barsar-e-ta'aruf the ehtiyat ke sae

wo bhi kuchh na kah pae hum bhi kuchh na kah pae

din hasin bahaaron ke yun bhi hum ko yaad aae

qahqahon ke afsane aansuon ne dohrae

kitne hi bhayanak hon un se KHauf kya khana

sae hain bahar-surat raushni ke hamsae

did ke tamashe bhi kam nahin sarabon se

dur hum hue utne jitne wo qarib aae

kis jagah hua hai gum kuchh pata nahin chalta

hum zamir-e-insan ko har taraf pukar aae

raushni mili lekin ye bhi aap ne dekha

dhup ki tamazat se kitne phul kumhlae

chhin le koi 'kaifi' mujh se meri tanhai

sanp ban ke Daste hain mujh ko ab mere sae