برسر تعارف تھے احتیاط کے سائے

برسر تعارف تھے احتیاط کے سائے

وہ بھی کچھ نہ کہہ پائے ہم بھی کچھ نہ کہہ پائے

دن حسیں بہاروں کے یوں بھی ہم کو یاد آئے

قہقہوں کے افسانے آنسوؤں نے دہرائے

کتنے ہی بھیانک ہوں ان سے خوف کیا کھانا

سائے ہیں بہر صورت روشنی کے ہمسائے

دید کے تماشے بھی کم نہیں سرابوں سے

دور ہم ہوئے اتنے جتنے وہ قریب آئے

کس جگہ ہوا ہے گم کچھ پتہ نہیں چلتا

ہم ضمیر انساں کو ہر طرف پکار آئے

روشنی ملی لیکن یہ بھی آپ نے دیکھا

دھوپ کی تمازت سے کتنے پھول کمہلائے

چھین لے کوئی کیفیؔ مجھ سے میری تنہائی

سانپ بن کے ڈستے ہیں مجھ کو اب مرے سائے