bas ek bar tera aks jhilmilaya tha

bas ek baar tirā aks jhilmilāyā thā

phir us ke ba.ad mirā jism thā na saaya thā

shadīd niiñd kā ġhalba thā kuchh pata na chalā

ki itnī raat ga.e kaun milne aayā thā

ḳhayāl aate hī ik Tiis sī ubhartī hai

malāl aaj bhī hai terā dil dukhāyā thā

mujhe pata thā darīche se raat jhāñkegī

isī ḳhayāl se maiñ chāñd le ke aayā thā

badal ga.e the manāzir palak jhapakte hī

mirā junūn bas ik baar rañg laayā thā

tum aa ga.e ho to lagtā hai aaj se pahle

mirī hayāt pe ik bad-duā kā saaya thā

bas ek bar tera aks jhilmilaya tha

phir us ke baad mera jism tha na saya tha

shadid nind ka ghalba tha kuchh pata na chala

ki itni raat gae kaun milne aaya tha

KHayal aate hi ek Tis si ubharti hai

malal aaj bhi hai tera dil dukhaya tha

mujhe pata tha dariche se raat jhankegi

isi KHayal se main chand le ke aaya tha

badal gae the manazir palak jhapakte hi

mera junun bas ek bar rang laya tha

tum aa gae ho to lagta hai aaj se pahle

meri hayat pe ek bad-dua ka saya tha