بس اسی کا غم نہیں ہے دل ہے دیوانہ ترا

بس اسی کا غم نہیں ہے دل ہے دیوانہ ترا

بندۂ بے دام ہے ہر مست و فرزانہ ترا

مظہر رنگ حقیقت جب ہے پیمانہ ترا

باعث سر مستئ عالم ہے مے خانہ ترا

ذکر کرتی ہے زباں عالم کی روزانہ ترا

دل نے چپ رہ کر سنا آنکھوں سے افسانہ ترا

گر یہی عالم رہا ذوق حجاب حسن کا

راز دل افشا نہ کر دے کوئی دیوانہ ترا

مشرب فردوس پر تو بھی عمل کر ناصحا

لا خدا کے نام پر بھر دوں میں پیمانہ ترا

سایۂ رحمت میں ہو جس کا جہان آرزو

کیوں ولی کر دے نہ اس کو لطف شاہانہ ترا

داستان حسن اور اس کی نمود دل نواز

خاک میں مل کر بیاں کرتا ہے پروانہ ترا

شادؔ ساقی کی نگاہوں میں رہیں ہر حال میں

یوں گنہ گاروں کو ہے محبوب مے خانہ ترا