bas itni baat pe itna uchhal raha hun main

bas itnī baat pe itnā uchhal rahā huuñ maiñ

ba-rang-e-ḳhvāb un āñkhoñ meñ pal rahā huuñ maiñ

tumhāre saath yahāñ tak to aa gayā lekin

ab is ke baa'd irāda badal rahā huuñ maiñ

tumhāre ḳhvāb ko āñkhoñ meñ rakh ke jaagā huā

tumhārī yaad ke talvoñ ko mal rahā huuñ maiñ

jis ek ḳhvāb ke bā'is huī thī zaḳhmī aañkh

us ek ḳhvāb ko ab tak masal rahā huuñ maiñ

tumhāre baa'd badan barf sā jamā huā thā

dubārā aañch lagī hai pighal rahā huuñ maiñ

badan zamīn ko tohfe meñ de diyā maiñ ne

ab āsmān kī jānib nikal rahā huuñ maiñ

sunā.ī detī hai tū mujh ko duur jaatī huī

dikhā.ī detā hai hāthoñ ko mal rahā huuñ maiñ

bas itni baat pe itna uchhal raha hun main

ba-rang-e-KHwab un aankhon mein pal raha hun main

tumhaare sath yahan tak to aa gaya lekin

ab is ke ba'd irada badal raha hun main

tumhaare KHwab ko aankhon mein rakh ke jaga hua

tumhaari yaad ke talwon ko mal raha hun main

jis ek KHwab ke ba'is hui thi zaKHmi aankh

us ek KHwab ko ab tak masal raha hun main

tumhaare ba'd badan barf sa jama hua tha

dubara aanch lagi hai pighal raha hun main

badan zamin ko tohfe mein de diya main ne

ab aasman ki jaanib nikal raha hun main

sunai deti hai tu mujh ko dur jati hui

dikhai deta hai hathon ko mal raha hun main