bas-ki na kaam aa saka ishq mein dil diya hua

bas-ki na kaam aa sakā 'ishq meñ dil diyā huā

hāsil-e-zīst ho gayā naam tirā liyā huā

hadd-e-junūñ se huuñ pare varna kahāñ ki rah sake

ḳhanda-e-nau-bahār se chāk-e-jigar siyā huā

'ishq kī aabrū vafā husn kī aarzū fanā

merā kiyā to kyā huā aap ne jo kiyā huā

kyoñ na havā-e-be-ḳhudī ho mujhe vaj.h-e-sarḳhushī

de ke sukūn-e-zindagī hai ye junūñ liyā huā

tere karam se go uThā lutf-e-jahān-e-mudda'ā

kam na magar huā tirā zauq-e-sitam diyā huā

chāragar-e-hayāt ne maut sī shai bhī dī to kyā

shauq-e-talab meñ bārhā zahr ye thā piyā huā

bas-ki na kaam aa saka 'ishq mein dil diya hua

hasil-e-zist ho gaya nam tera liya hua

hadd-e-junun se hun pare warna kahan ki rah sake

KHanda-e-nau-bahaar se chaak-e-jigar siya hua

'ishq ki aabru wafa husn ki aarzu fana

mera kiya to kya hua aap ne jo kiya hua

kyon na hawa-e-be-KHudi ho mujhe wajh-e-sarKHushi

de ke sukun-e-zindagi hai ye junun liya hua

tere karam se go uTha lutf-e-jahan-e-mudda'a

kam na magar hua tera zauq-e-sitam diya hua

chaaragar-e-hayat ne maut si shai bhi di to kya

shauq-e-talab mein barha zahr ye tha piya hua