bashar ke dil par azal se likkhi KHuda ki pahli kitab hun main

bashar ke dil par azal se likkhī ḳhudā kī pahlī kitāb huuñ maiñ

sunā rahā hai zamāna jis ko abad talak kā ḳhitāb huuñ maiñ

jo raakh samjho to aag jaisī jo zahr gholo to naag aisī

tumhārā partav likhī ga.ī huuñ tumhāre jaisā 'azāb huuñ maiñ

napī-tulī sī nigāh mere badan pe yaksar ghumāne vaalo

tumhārī 'aqloñ pe jo paḌā hai siyāh sangīñ hijāb huuñ maiñ

kalī kī sūrat masal ke mujh ko baḌhā rahe ho dukān-e-ḳhushbū

har ek gāhak se kah rahe ho sadā mahaktā gulāb huuñ maiñ

jo daftaroñ meñ jamī huī huuñ baqā kī ḳhātir khaḌī huī huuñ

savāl ban kar mujhe na dekho zarūratoñ kā javāb huuñ meñ

tumhī ne chhup kar mohabbatoñ ke dinoñ meñ mujh ko gulāb bheje

aur ab sabhī se ye kah rahe ho ġhalat farebī ḳharāb huuñ maiñ

mirī haqīqat ke ek ruḳh se nisāb-dānoñ ne ḳhuub khelā

kisī ne bas angbīn samjhā kisī ne likkhā sharāb huuñ meñ

bashar ke dil par azal se likkhi KHuda ki pahli kitab hun main

suna raha hai zamana jis ko abad talak ka KHitab hun main

jo rakh samjho to aag jaisi jo zahr gholo to nag aisi

tumhaara partaw likhi gai hun tumhaare jaisa 'azab hun main

napi-tuli si nigah mere badan pe yaksar ghumane walo

tumhaari 'aqlon pe jo paDa hai siyah sangin hijab hun main

kali ki surat masal ke mujh ko baDha rahe ho dukan-e-KHushbu

har ek gahak se kah rahe ho sada mahakta gulab hun main

jo daftaron mein jami hui hun baqa ki KHatir khaDi hui hun

sawal ban kar mujhe na dekho zaruraton ka jawab hun mein

tumhi ne chhup kar mohabbaton ke dinon mein mujh ko gulab bheje

aur ab sabhi se ye kah rahe ho ghalat farebi KHarab hun main

meri haqiqat ke ek ruKH se nisab-danon ne KHub khela

kisi ne bas angbin samjha kisi ne likkha sharab hun mein