bayan-e-dard-e-mohabbat jo bar bar na ho

bayān-e-dard-e-mohabbat jo baar baar na ho

koī naqāb tire ruḳh kī parda-dār na ho

salām-e-shauq kī jur.at se dil laraztā hai

kahīñ mizāj girāmī pe ye bhī baar na ho

karam pe aa.eñ to har har adā meñ ishq hī ishq

na ho to un kā taġhāful bhī āshkār na ho

yahī ḳhayāl rahā pattharoñ kī bārish meñ

kahīñ unhīñ meñ koī sañg-e-kū-e-yār na ho

abhī hai aas ki āḳhir kabhī to aa.egā

vo ek lamha ki jab terā intizār na ho

bahut fareb samajhtā huuñ phir bhī ai 'ālī'

maiñ kyā karūñ agar un par bhī e'tibār na ho

bayan-e-dard-e-mohabbat jo bar bar na ho

koi naqab tere ruKH ki parda-dar na ho

salam-e-shauq ki jurat se dil larazta hai

kahin mizaj girami pe ye bhi bar na ho

karam pe aaen to har har ada mein ishq hi ishq

na ho to un ka taghaful bhi aashkar na ho

yahi KHayal raha pattharon ki barish mein

kahin unhin mein koi sang-e-ku-e-yar na ho

abhi hai aas ki aaKHir kabhi to aaega

wo ek lamha ki jab tera intizar na ho

bahut fareb samajhta hun phir bhi ai 'ali'

main kya karun agar un par bhi e'tibar na ho