بزم سخن ہے اور سخنداں نئے نئے

بزم سخن ہے اور سخنداں نئے نئے

محفل میں آج آئے ہیں مہماں نئے نئے

کن منزلوں کی تاک میں یہ کاروان زیست

راہیں نئی نئی ہیں گلستاں نئے نئے

بالکل غلط ہے کون یہ کہتا ہے وجد میں

ملتے نہیں جنوں کو بیاباں نئے نئے

ساقی ذرا نظر تو اٹھا دیکھ بزم میں

پینے کو آج آئے ہیں مہماں نئے نئے

جب تک ہے سانس حوصلہ باقی رہے مرا

ڈھونڈا کروں گا درد کے درماں نئے نئے

مسکان ابروؤں کے اشارے سلام عشق

کیسے اٹھائے جائیں گے احساں نئے نئے

کیا غم جو اجنبی ہے ذرا گفتگو سحرؔ

ان کے لئے تو آپ ہیں مہماں نئے نئے