بے برگ و ثمر ہو تو شجر کیسے کہوں گا

بے برگ و ثمر ہو تو شجر کیسے کہوں گا

پھر دشت کو دریا کا سفر کیسے کہوں گا

مر جاتی ہے دب کر کوئی خواہش مرے دل میں

گرتی ہوئی دیوار کو گھر کیسے کہوں گا

صد پردہ خلوت میں چمکتی ہے مری روح

دل میں ہے مرے شمس و قمر کیسے کہوں گا

بے مایہ و بے کس ہی سہی تیری حیا ہوں

ہو جائے تری مجھ پہ نظر کیسے کہوں گا

میں ترے لئے ہجر کی اک بہتی ہوا ہوں

تو آ مجھے آغوش میں بھر کیسے کہوں گا

احساس کے بادل میں چھپا ہے کوئی سورج

یہ دن کا اجالا ہے مگر کیسے کہوں گا

مخدوش ہے یہ گھر بھی جو ہے تیری امانت

تو آ کے مری جاں میں اتر کیسے کہوں گا

اک مصرعۂ آوارہ تو اٹھتا نہیں مجھ سے

آتا ہے غزل کا بھی ہنر کیسے کہوں گا