be-hisi rahti hai jab madd-e-muqabil tanha

be-hisī rahtī hai jab madd-e-muqābil tanhā

zindagī DhūñDhtī rah jaatī hai manzil tanhā

sab ne to baañT lī hai sub.h-e-masarrat mil kar

tai kiye ham ne shab-e-ġham ke marāhil tanhā

yaad aa jaatī hai us vaqt dabe paañv tirī

jab kabhī rahtī hai ye bārgah-e-dil tanhā

ḳhauf-e-girdāb-e-talātum thā jinheñ bhaag ga.e

bas khaḌā rah gayā maiñ hī sar-e-sāhil tanhā

aur baḌh jaatī hai ye kashmakash-e-dil 'bismil'

jab bhī jaatā huuñ sū-e-kūcha-e-qātil tanhā

be-hisi rahti hai jab madd-e-muqabil tanha

zindagi DhunDhti rah jati hai manzil tanha

sab ne to banT li hai subh-e-masarrat mil kar

tai kiye hum ne shab-e-gham ke marahil tanha

yaad aa jati hai us waqt dabe panw teri

jab kabhi rahti hai ye bargah-e-dil tanha

KHauf-e-girdab-e-talatum tha jinhen bhag gae

bas khaDa rah gaya main hi sar-e-sahil tanha

aur baDh jati hai ye kashmakash-e-dil 'bismil'

jab bhi jata hun su-e-kucha-e-qatil tanha