be-KHudi si jo mere tan mein rachi hai saqi

be-ḳhudī sī jo mire tan meñ rachī hai saaqī

mai tirī chashm-e-fusūñ-sāz se pī hai saaqī

ye chhalakte hue ḳhum jaam surāhī sāġhar

kyā hī sairāb mirī tishna-labī hai saaqī

jis kā har dar kisī jannat kī taraf khultā hai

terā mai-ḳhāna vahī bāra-darī hai saaqī

lā koī jām-e-sakīnat ki qarār aa.e ise

mere sar meñ jo ye shorīda-sarī hai saaqī

ek do ghūñT faqat ġham ko bhulāne ke liye

tere mai-ḳhāne meñ kab koī kamī hai saaqī

na milā aab musaffā hī pilā aaj mujhe

tā bujhe aag jo siine meñ lagī hai saaqī

raqs kartī huī ab vajd meñ lā.egī mujhe

tere shīshe meñ jo rangīn parī hai saaqī

tū musir gar hai ki piinā bhī hai ik kār-e-savāb

lā pilā terī ḳhushī merī ḳhushī hai saaqī

hai mai-e-nāb se sarsabz mire tan kā shajar

tere altāf se har shāḳh harī hai saaqī

der mat karnā 'atā meñ ki rahe yā na rahe

terā mai-kash jo charāġh-e-saharī hai saaqī

hosh meñ rahnā thā āzār huā 'nasrīñ' par

tū jo maa.il huā tab baat banī hai saaqī

be-KHudi si jo mere tan mein rachi hai saqi

mai teri chashm-e-fusun-saz se pi hai saqi

ye chhalakte hue KHum jam surahi saghar

kya hi sairab meri tishna-labi hai saqi

jis ka har dar kisi jannat ki taraf khulta hai

tera mai-KHana wahi bara-dari hai saqi

la koi jam-e-sakinat ki qarar aae ise

mere sar mein jo ye shorida-sari hai saqi

ek do ghunT faqat gham ko bhulane ke liye

tere mai-KHane mein kab koi kami hai saqi

na mila aab musaffa hi pila aaj mujhe

ta bujhe aag jo sine mein lagi hai saqi

raqs karti hui ab wajd mein laegi mujhe

tere shishe mein jo rangin pari hai saqi

tu musir gar hai ki pina bhi hai ek kar-e-sawab

la pila teri KHushi meri KHushi hai saqi

hai mai-e-nab se sarsabz mere tan ka shajar

tere altaf se har shaKH hari hai saqi

der mat karna 'ata mein ki rahe ya na rahe

tera mai-kash jo charagh-e-sahari hai saqi

hosh mein rahna tha aazar hua 'nasrin' par

tu jo mail hua tab baat bani hai saqi