be-mani kar doge apne jumlon ko

be-mā'nī kar doge apne jumloñ ko

harfoñ meñ taqsīm na karnā lafzoñ ko

duur ufuq par sūraj ubhrā hai lekin

kaun haTā.egā khiḌkī se pardoñ ko

pathrīle jangal kī hadeñ phailānā mat

shahroñ meñ tabdīl na karnā qasboñ ko

ek hī mausam raas nahīñ aatā hai kabhī

sarsoñ gehūñ aur chāval kī fasloñ ko

karte haiñ jo log tijārat shīshoñ kī

ḳhud hī nahīñ pahchānte apne chehroñ ko

aa.e nahīñ jo saath safar meñ chand qadam

vo bhī sahlāte haiñ apne talvoñ ko

kab tak us ko yaad karoge 'āsim' tum

kab tak āḳhir khurchoge in zaḳhmoñ ko

be-ma'ni kar doge apne jumlon ko

harfon mein taqsim na karna lafzon ko

dur ufuq par suraj ubhra hai lekin

kaun haTaega khiDki se pardon ko

pathrile jangal ki haden phailana mat

shahron mein tabdil na karna qasbon ko

ek hi mausam ras nahin aata hai kabhi

sarson gehun aur chawal ki faslon ko

karte hain jo log tijarat shishon ki

KHud hi nahin pahchante apne chehron ko

aae nahin jo sath safar mein chand qadam

wo bhi sahlate hain apne talwon ko

kab tak us ko yaad karoge 'asim' tum

kab tak aaKHir khurchoge in zaKHmon ko