be-niyaz dahr kar deta hai ishq

be-niyāz dahr kar detā hai ishq

be-zaroñ ko la.al-o-zar detā hai ishq

kam-nihād-o-be-sabāt insān meñ

jaane kyā kyā jam.a kar detā hai ishq

kaun jaane us kī ulTī mantiqeñ

TuuTe hāthoñ meñ sipar detā hai ishq

pahle kar detā hai sab aalam siyāh

aur phir apnī ḳhabar detā hai ishq

jaan denā khelte hañste hue

qatl hone kā hunar detā hai ishq

kaT gireñ aur phir bhī qaa.em haiñ safeñ

kitne baazū kitne sar detā hai ishq

sar-barahna haiñ anā gumbad jo the

āñdhiyoñ se sau ko bhar detā hai ishq

dard-mandī par jo qaa.em hoñ unheñ

nūr-afzā chashm-e-tar detā hai ishq

ek bojhal raat kaT jaane ke ba.ad

ek lamhe ko sahar detā hai ishq

ye samajh tum ko bhī hogī sāhibo

dil ko kyuuñ sho.aloñ meñ dhar detā hai ishq

chal nikalne kā irāda bāñdhiye

dekhiye samt-e-safar detā hai ishq

qadr hai jis kī ḳhiyām-e-hūr meñ

aabrū kā vo guhar detā hai ishq

be-niyaz dahr kar deta hai ishq

be-zaron ko lal-o-zar deta hai ishq

kam-nihad-o-be-sabaat insan mein

jaane kya kya jama kar deta hai ishq

kaun jaane us ki ulTi mantiqen

TuTe hathon mein sipar deta hai ishq

pahle kar deta hai sab aalam siyah

aur phir apni KHabar deta hai ishq

jaan dena khelte hanste hue

qatl hone ka hunar deta hai ishq

kaT giren aur phir bhi qaem hain safen

kitne bazu kitne sar deta hai ishq

sar-barahna hain ana gumbad jo the

aandhiyon se sau ko bhar deta hai ishq

dard-mandi par jo qaem hon unhen

nur-afza chashm-e-tar deta hai ishq

ek bojhal raat kaT jaane ke baad

ek lamhe ko sahar deta hai ishq

ye samajh tum ko bhi hogi sahibo

dil ko kyun shoalon mein dhar deta hai ishq

chal nikalne ka irada bandhiye

dekhiye samt-e-safar deta hai ishq

qadr hai jis ki KHiyam-e-hur mein

aabru ka wo guhar deta hai ishq