be-niyazi se mudaraat se Dar lagta hai

be-niyāzī se mudārāt se Dar lagtā hai

jaane kyā baat hai har baat se Dar lagtā hai

sāġhar-e-bāda-e-gul-rañg to kuchh duur nahīñ

nigah-e-pīr-e-ḳharābāt se Dar lagtā hai

dil pe khaa.ī huī ik choT ubhar aatī hai

tere dīvāne ko barsāt se Dar lagtā hai

ai dil afsāna-e-āġhāz-e-vafā rahne de

mujh ko biite hue lamhāt se Dar lagtā hai

haath se zabt kā dāman na kahīñ chhuT jaa.e

aap kī pursish-e-hālāt se Dar lagtā hai

maiñ jo us bazm meñ jaatā nahīñ 'ash.ar' mujh ko

apne sahme hue jazbāt se Dar lagtā hai

be-niyazi se mudaraat se Dar lagta hai

jaane kya baat hai har baat se Dar lagta hai

saghar-e-baada-e-gul-rang to kuchh dur nahin

nigah-e-pir-e-KHarabaat se Dar lagta hai

dil pe khai hui ek choT ubhar aati hai

tere diwane ko barsat se Dar lagta hai

ai dil afsana-e-aghaz-e-wafa rahne de

mujh ko bite hue lamhat se Dar lagta hai

hath se zabt ka daman na kahin chhuT jae

aap ki pursish-e-haalat se Dar lagta hai

main jo us bazm mein jata nahin 'ashar' mujh ko

apne sahme hue jazbaat se Dar lagta hai