be-rabt se lafzon ke hain be-rabt maani

be-rabt se lafzoñ ke haiñ be-rabt ma'ānī

bālā-e-had-e-fahm hai hastī kī kahānī

ab lauT ke dekhūñ to dikhā.ī nahīñ detī

us rishta-e-derīna kī koī bhī nishānī

sahrā meñ pas-e-shām nikal aa.e na sūraj

lene ko hai añgḌā.ī vo ḳhvābīda javānī

dil meñ to samundar haiñ bahut karb ke lekin

āñkhoñ ko mayassar nahīñ do buuñd bhī paanī

bahte hue dariyā pe na kar takiya ki is ne

jalte hue ḳhemoñ kī nahīñ aag bujhānī

ai husn-e-samā'at abhī fursat nahīñ varna

ik turfa hikāyat thī mujhe tujh ko sunānī

mujh ko bhī havas rasta badalne kī thī lekin

qadmoñ ne kisī taur mirī baat na maanī

phir dekheñge kab sabz zamāna mire mausam

phir lauT ke kab aa.egī sā'at vo suhānī

ik lamha-e-āzād kī taḳhlīq hai ulfat

nāfiz hai kahāñ is pe koī qaid-e-zamānī

be-rabt se lafzon ke hain be-rabt ma'ani

baala-e-had-e-fahm hai hasti ki kahani

ab lauT ke dekhun to dikhai nahin deti

us rishta-e-derina ki koi bhi nishani

sahra mein pas-e-sham nikal aae na suraj

lene ko hai angDai wo KHwabida jawani

dil mein to samundar hain bahut karb ke lekin

aankhon ko mayassar nahin do bund bhi pani

bahte hue dariya pe na kar takiya ki is ne

jalte hue KHemon ki nahin aag bujhani

ai husn-e-sama'at abhi fursat nahin warna

ek turfa hikayat thi mujhe tujh ko sunani

mujh ko bhi hawas rasta badalne ki thi lekin

qadmon ne kisi taur meri baat na mani

phir dekhenge kab sabz zamana mere mausam

phir lauT ke kab aaegi sa'at wo suhani

ek lamha-e-azad ki taKHliq hai ulfat

nafiz hai kahan is pe koi qaid-e-zamani