بے سبب کوئی فریضہ نہیں اچھا ہوتا

بے سبب کوئی فریضہ نہیں اچھا ہوتا

جلد بازی کا نتیجہ نہیں اچھا ہوتا

خون کے رشتے مقدس ہیں مگر دنیا میں

دوستی سے کوئی رشتہ نہیں اچھا ہوتا

یہ بزرگوں کی نصیحت ہے اسے یاد رکھو

گھر کے آنگن میں تماشا نہیں اچھا ہوتا

اختلافات کی قدریں بھی معین کیجے

حد سے بڑھ کر کوئی فتنہ نہیں اچھا ہوتا

زندگی کے تو کئی اور بھی رخ ہیں صاحب

رات دن ایک ہی قصہ نہیں اچھا ہوتا

گھر کی تعمیر کی تدبیر کرو کچھ راہیؔ

صرف کاغذ ہی پہ نقشہ نہیں اچھا ہوتا