be-zabanon ka bhi ek taur bayan hota hai

be-zabānoñ kā bhī ik taur bayāñ hotā hai

chal mujhe le ke vahāñ chal ye jahāñ hotā hai

kisī kā saarā jahāñ kū-e-butāñ hotā hai

dil mirā chīḳh ke kahtā hai ki haañ hotā hai

ai ḳhudā tujh se mohabbat to nahīñ kam lekin

mujh pe ġhālib ye magar kār-e-jahāñ hotā hai

hijr meñ tum mire hañsne kā gila karte ho

asl meñ vo mirī jaañ zabt-e-fuġhāñ hotā hai

mire ash'ār ko āsān samajhne vaalo

mire har she'r meñ ik ramz nihāñ hotā hai

tum mujhe bāñdh ke rakh lo jo agar mumkin ho

yaar ḳhushbū kā magar koī makāñ hotā hai

merī āvāz se āvāz milāne vaale

tū mire saath hai yā mujh ko gumāñ hotā hai

tujh se maiñ soch ke aatī huuñ bahut kuchh kahne

par tire sāmne har lafz girāñ hotā hai

be-zabanon ka bhi ek taur bayan hota hai

chal mujhe le ke wahan chal ye jahan hota hai

kisi ka sara jahan ku-e-butan hota hai

dil mera chiKH ke kahta hai ki han hota hai

ai KHuda tujh se mohabbat to nahin kam lekin

mujh pe ghaalib ye magar kar-e-jahan hota hai

hijr mein tum mere hansne ka gila karte ho

asl mein wo meri jaan zabt-e-fughan hota hai

mere ash'ar ko aasan samajhne walo

mere har she'r mein ek ramz nihan hota hai

tum mujhe bandh ke rakh lo jo agar mumkin ho

yar KHushbu ka magar koi makan hota hai

meri aawaz se aawaz milane wale

tu mere sath hai ya mujh ko guman hota hai

tujh se main soch ke aati hun bahut kuchh kahne

par tere samne har lafz giran hota hai