بے زبانوں کا بھی اک طور بیاں ہوتا ہے

بے زبانوں کا بھی اک طور بیاں ہوتا ہے

چل مجھے لے کے وہاں چل یہ جہاں ہوتا ہے

کسی کا سارا جہاں کوئے بتاں ہوتا ہے

دل مرا چیخ کے کہتا ہے کہ ہاں ہوتا ہے

اے خدا تجھ سے محبت تو نہیں کم لیکن

مجھ پہ غالب یہ مگر کار جہاں ہوتا ہے

ہجر میں تم مرے ہنسنے کا گلہ کرتے ہو

اصل میں وہ مری جاں ضبط فغاں ہوتا ہے

مرے اشعار کو آسان سمجھنے والو

مرے ہر شعر میں اک رمز نہاں ہوتا ہے

تم مجھے باندھ کے رکھ لو جو اگر ممکن ہو

یار خوشبو کا مگر کوئی مکاں ہوتا ہے

میری آواز سے آواز ملانے والے

تو مرے ساتھ ہے یا مجھ کو گماں ہوتا ہے

تجھ سے میں سوچ کے آتی ہوں بہت کچھ کہنے

پر ترے سامنے ہر لفظ گراں ہوتا ہے