begana-e-qayud-e-bahaar-o-KHizan rahe

begāna-e-qayūd-e-bahār-o-ḳhizāñ rahe

yārab mirā junūn-e-mohabbat javāñ rahe

ye bhī samajh sakī hai na ab tak nigāh-e-shauq

tum ne kahāñ fareb diyā aur kahāñ rahe

duniyā meñ chāk-dil ko nahīñ pūchhtā koī

kyā jaane kitne ahl-e-junūñ be-nishāñ rahe

us anjuman meñ ham bhī pahuñch to ga.e magar

jab tak rahe mizāj-e-nazar par garāñ rahe

kyā kyā jafā.eñ kī haiñ har ik aarzū ke saath

aur is tarah ki un pe vafā kā gumāñ rahe

ab yuuñ karam na kar ki ba-īñ vasf-e-husn-o-nāz

shāyad tujhe bhī ishq kā saudā garāñ rahe

lene de apnā naam bhī mujh ko ki mere ba.ad

tū bhī mirī ġhazal ke sabab jāvedāñ rahe

begana-e-qayud-e-bahaar-o-KHizan rahe

yarab mera junun-e-mohabbat jawan rahe

ye bhi samajh saki hai na ab tak nigah-e-shauq

tum ne kahan fareb diya aur kahan rahe

duniya mein chaak-dil ko nahin puchhta koi

kya jaane kitne ahl-e-junun be-nishan rahe

us anjuman mein hum bhi pahunch to gae magar

jab tak rahe mizaj-e-nazar par garan rahe

kya kya jafaen ki hain har ek aarzu ke sath

aur is tarah ki un pe wafa ka guman rahe

ab yun karam na kar ki ba-in wasf-e-husn-o-naz

shayad tujhe bhi ishq ka sauda garan rahe

lene de apna nam bhi mujh ko ki mere baad

tu bhi meri ghazal ke sabab jawedan rahe