bhagte sayon ke pichhe ta-ba-kai dauDa karen

bhāgte sāyoñ ke pīchhe tā-ba-kai dauḌā kareñ

zindagī tū hī batā kab tak tirā pīchhā kareñ

rū-e-gul ho chehra-e-mahtāb ho yā husn-e-dost

har chamaktī chiiz ko kuchh duur se dekhā kareñ

be-niyāzī ḳhud sarāpā iltijā ban jā.egī

aap apnī dāstāñ meñ husn to paidā kareñ

dil ki thā ḳhush-fahm āgāh-e-haqīqat ho gayā

shukr bhejeñ yā tirī bedād kā shikva kareñ

muġhbachoñ se mohtasib tak saikḌoñ darbār haiñ

ek sāġhar ke liye kis kis ko ham sajda kareñ

tishnagī had se baḌhī hai mashġhala koī nahīñ

shīsha-o-sāġhar na toḌeñ bāda-kash to kyā kareñ

dūsroñ par tabsira farmāne se pahle 'hafīz'

apne dāman kī taraf bhī ik nazar dekhā kareñ

bhagte sayon ke pichhe ta-ba-kai dauDa karen

zindagi tu hi bata kab tak tera pichha karen

ru-e-gul ho chehra-e-mahtab ho ya husn-e-dost

har chamakti chiz ko kuchh dur se dekha karen

be-niyazi KHud sarapa iltija ban jaegi

aap apni dastan mein husn to paida karen

dil ki tha KHush-fahm aagah-e-haqiqat ho gaya

shukr bhejen ya teri bedad ka shikwa karen

mughbachon se mohtasib tak saikDon darbar hain

ek saghar ke liye kis kis ko hum sajda karen

tishnagi had se baDhi hai mashghala koi nahin

shisha-o-saghar na toDen baada-kash to kya karen

dusron par tabsira farmane se pahle 'hafiz'

apne daman ki taraf bhi ek nazar dekha karen