bhiD hai logon ki har su aashna koi nahin

bhiiḌ hai logoñ kī har sū āshnā koī nahīñ

maiñ kise āvāz duuñ pahchāntā koī nahīñ

an-ginat patte gire peḌoñ se ashkoñ kī tarah

ab kī rut meñ hādsoñ kī intihā koī nahīñ

mere dil meñ chāñd raushan merī palkoñ par nujūm

maiñ zamīñ par āsmāñ huuñ jāntā koī nahīñ

aap ke naqsh-e-qadam bhī ab nahīñ manzil-numā

lauT jaane kā bhī ab to rāsta koī nahīñ

dushmanoñ ko bhī jo dars-e-dostī detā rahe

is sitamgar daur meñ itnā baḌā koī nahīñ

kis qadar begānagī hai shahr-e-be-ehsās meñ

aadmī se aadmī kā rābta koī nahīñ

be-talab kis ke gale meñ Daal duuñ is haar ko

mujh se merī zindagī bhī māñgtā koī nahīñ

kyā vazāhat maiñ karūñ kyā log hoñge mutma.in

tujh ko merī aañkh se to dekhtā koī nahīñ

raat ke pichhle pahar 'nusrat' kise āvāz duuñ

so rahā hai shahr saarā jāgtā koī nahīñ

bhiD hai logon ki har su aashna koi nahin

main kise aawaz dun pahchanta koi nahin

an-ginat patte gire peDon se ashkon ki tarah

ab ki rut mein hadson ki intiha koi nahin

mere dil mein chand raushan meri palkon par nujum

main zamin par aasman hun jaanta koi nahin

aap ke naqsh-e-qadam bhi ab nahin manzil-numa

lauT jaane ka bhi ab to rasta koi nahin

dushmanon ko bhi jo dars-e-dosti deta rahe

is sitamgar daur mein itna baDa koi nahin

kis qadar beganagi hai shahr-e-be-ehsas mein

aadmi se aadmi ka rabta koi nahin

be-talab kis ke gale mein Dal dun is haar ko

mujh se meri zindagi bhi mangta koi nahin

kya wazahat main karun kya log honge mutmain

tujh ko meri aankh se to dekhta koi nahin

raat ke pichhle pahar 'nusrat' kise aawaz dun

so raha hai shahr sara jagta koi nahin