bhul jaane ke liye yaad kiya

bhuul jaane ke liye yaad kiyā

dil ko nāshād kiyā shaad kiyā

ḳhalq kar ke mirī afzā.ish kī

vāqa'e se mujhe rūdād kiyā

thā agar hurmat-e-vahdat kā ḳhayāl

kyoñ mujhe fard se afrād kiyā

vaqt meñ Daal dī barkat us ne

chand lamhāt ko mī'ād kiyā

aa tujhe dil se rihā.ī de duuñ

jā tujhe qaid se āzād kiyā

ek jangal hī ujāḌā ham ne

shahr jab bhī koī ābād kiyā

kar liyā ḳhud se kināra 'āsim'

ajnabī shaḳhs ko ham-zād kiyā

bhul jaane ke liye yaad kiya

dil ko nashad kiya shad kiya

KHalq kar ke meri afzaish ki

waqa'e se mujhe rudad kiya

tha agar hurmat-e-wahdat ka KHayal

kyon mujhe fard se afrad kiya

waqt mein Dal di barkat us ne

chand lamhat ko mi'ad kiya

aa tujhe dil se rihai de dun

ja tujhe qaid se aazad kiya

ek jangal hi ujaDa hum ne

shahr jab bhi koi aabaad kiya

kar liya KHud se kinara 'asim'

ajnabi shaKHs ko ham-zad kiya